ICYO DUKWIYE KWITAHO

 ICYO DUKWIYE KWITAHO

by Rwayitare Eric

 ICYO DUKWIYE KWITAHO

“Iyo baba abanyabwenge baba bamenye ibi, Baba bitaye ku iherezo ryabo.” (Gutegeka kwa Kabiri 32:29) 

1.     INTANGIRIRO

Mose yarebye abisiraheli, uko bajyendaga bibagirwa nyuma y’agahe gato ibitangaza Imana Yabaga Imaze kubakorera, biramutangaza cyane, bituma aririmba indirimbo y’igihamya ku gusubira inyuma kwabo ndetse no kudahemuka kw’Imana (Gutegeka kwa kabiri32). Yageze aho avuga ko iyo baba abanyabwenge baba bitaye ku iherezo ryabo. Imigani 7:8 havuga ko “iherezo ry’ikintu riruta intangiriro yacyo”, bityo nubwo bari baratangiye neza, icyari kuruta nuko bari burangize neza biruta gutangira neza ukarangiza nabi. Niko natwe mu buzima bwa buri munsi twagakwiye kwibaza. Gutangira neza ntacyo bivuze na gato. Ni muri urwo rwego twigira ku buzima bw’umwami Uziya uvugwa mu Ingoma za kabiri 26 ndetse n’umwami Manase uvugwa mu Ingoma za kabiri 33. Abo bami bombi batangiye kuyobora ari bato cyane umwe afite imyaka 16 naho undi afite 12, bakaba barategetse imyaka ijya kungana aho umwe yategetse imyaka 52 undi ikaba 55.

Muri iyi nyigisho turareba ubuzima bwa Uziya na Manase, maze tubigireho mu buzima bwa Gikristo bwacu, turebe icyo twakora nk’abantu bagiriwe ubuntu bwo kumenya Yesu ariwe bwenge bw’Imana. Kandi n’abatarakira Yesu muri iyi nyigisho babasha guhishurirwa ubwiza bw’Imana butuma baticiraho iteka ahubwo bagahindukira, bakabarirwa mu banyabwenge kubwo guhitamo Yesu Kristo.

2.     UBUZIMA BW’UMWAMI UZIYA

Umwami uziya yagiye ku ngoma igihe  Ubuyuda bwari mu bibazo bikomeye. Ni nyuma y’ibyago byari bimaze gutuma ubwami bwa se Amasiya bugera ku ndunduro. Yerusalemu yarifite abanzi bayigose kandi igice kingenzi k’igikuta cyangwa se inkike kiyirinda cyarasenywe. Mu bijyanye n’ubukungu, ubutunzi bwo mu rusengero n’inzu y’umwami bwari byarasahuwe kandi bamwe mu baturage bari bajyanyweho bunyago muri Isiraheli mu ntambara se Amasiya yari yateje kuri Isiraheli. Uziya yatangiye gutekeka afite imyaka cumi n’itandatu.

Bibiriya iravuga ngo “Uziya akora ibishimwa n’Uwiteka, nk’ibyo se Amasiya yakoraga byose. Amaramaza gushaka Imana mu bihe bya Zekariya wari ufite ubwenge bwo kumenya ibyerekanwa, kandi igihe cyose yamaze ashaka Uwiteka, Imana imuha umugisha.”(2 Ingoma 26:4-5)

Uko gushaka Imana byatumye Uziya agera kubintu bikomeye, atsinda intambara zose yarwanye, yubaka iminara i Yerusalemu ku irembo ryo mu nkokora y’inkike, no ku irembo ryo mu gikombe n’aho inkike ihetera, arayikomeza. Kandi yubaka iminara no mu butayu, afukura n’amariba menshi, ndetse ateza imbere ubuhinzi.

Yubatse igisirikare gikomeye ndetse yanavumbuye icyo wakita tekinoloji y’icyo gihe mu bijyanye n’intambara aho yakoze ibyuma byahimbwe n’abagabo b’abahanga, byo kuba ku minara no ku nkike aho kurwanira, ngo barase imyambi n’amabuye manini. Ibyo byatumye Izina rye ryamamara rigera kure kuko yafashijwe bitangaje, kugeza aho yagiriye imbaraga avuye ku busa.

Nubwo Uziya yakoze ibyiza byinshi biturutse ku gushaka Imana mu ntangiriro ze, ariko agize imbaraga ariyogeza mu mutima we, bituma akora ibyo gukiranirwa acumura ku Uwiteka Imana ye, kuko yinjiye mu rusengero rw’Uwiteka akosereza imibavu ku cyotero cy’imibavu (2 Ingoma 26:16). Ibyo wari umurimo ugenewe abatambyi, gusa ariko kubwo kwibona bituma akora ibyo atagenewe. Imana yamuteje ibibembe, umwami wari watangiye neza, bituma arangiza ubuzima bwe nabi, bityo Ijambo Mose yavuze rimusohoreraho abarwa nk’umuswa kandi yarakoze ibyiza byinshi mu ntangiriro.

3.     UBUZIMA BW’UMWAMI MANASE

Manase yimye ingoma afite imyaka 12, akaba ari umwana w’umwami Hezekiya, akaba yaramubyaye mu myaka 15 y’inyongezo yahawe n’Imana mu Abami ba kabiri 20:6. Manase yayoboye imyaka 55, akora ibibi byose bishoboka. Bibiliya ivuga ko “Manase yacishije abana be mu muriro mu gikombe cya mwene Hinomu (ubu n’uburyo batambaga abana bakabatwika bagashya bagakongoka batambira ikigirwamana kitwa Moleki), akaragurisha ibicu, akaraguza abapfumu, akagira iby’uburozi, agashikisha abashitsi n’abakonikoni. Akora ibibi byinshi imbere y’Uwiteka, aramurakaza. Kandi aremesha igishushanyo cy’ikigirwamana Asheri, agishyira mu nzu y’Imana imwe Salomo yubatse (ikigirwamana Asheri nicyo kitwa kandi Venusi bakiramyaga basambana, kitwaga imana y’uburumbuke) (2 Ingoma 33:6-7, 2 Abami 21:7).

Bibiliya ivuga ko Manase yavushije amaraso menshi yabatacumuye akayuzuza I Yerusalemu. Ndetse inzandiko z’amateka zimwe mu mico y’abayawudi zivuga ko Manase ariwe wishe umuhanuzi Yesaya amuciyemo kabiri n’urukerezo, abasobanura bakavuga ko bishoboka ko ariwe uvugwa mu gitabo cy’Abaheburayo 11:37 wakerejwe urukerezo. Muri macye ntakintu kibi kibaho Manase yasize adakoze. Ariko noneho Bibiliya ivuga ko igihe ingabo z’umwami w’Ashuri zamuteraga, zikamufata, zikamubohesha iminyururu, zimujyanye I Babuloni yagaruye ubwenge ku gihe.

Bibiriya iravuga ngo “Maze ageze mu makuba yinginga Uwiteka Imana ye, yicishiriza bugufi cyane imbere y’Imana ya ba sekuruza arayisaba, nuko Imana yemera kwinginga kwe, yumva ibyo asabye imusubiza i Yerusalemu mu bwami bwe. Manase aherako amenya yuko Uwiteka ari we Mana (2 Ingoma 33:12).”

Bibiliya hepfo ikomeza ivuga ngo “Kandi [Manase] akuraho imana z’inyamahanga na cya kigirwamana agikura mu nzu y’Uwiteka, asenya ibicaniro byose yari yubatse ku musozi w’inzu y’Uwiteka ari wo Yerusalemu, abijugunya inyuma y’umurwa. Maze asana icyotero cy’Uwiteka, agitambiraho ibitambo by’ishimwe yuko ari amahoro n’ibyo guhimbaza, kandi ategeka Abayuda gukorera Uwiteka Imana ya Isirayeli (2 Ingoma 33:15-16).”

Manase watangiye ubuzima bwe akora ibibi birenze urugero, yarangije neza agira iherezo ryiza nubwo igihugu kitababariwe ibibi cyakoze kubwe, ariko we turabona ko yashoje neza asaba Imana Imbabazi kandi agerageza guhindura ibyo yangije mu gihe cye.

4.     UMWANZURO

Muri macye tubashije kubona uko Uziya wari Umwami w’igitangaza wubaha Imana, yaje kugwa mu iherezo rye, maze akarangiza urugendo rw’ubuzima nabi yishwe n’ibibembe ari igicibwa mu bantu nubwo mu ntangiriro ze yubahaga Imana. Ku rundi ruhande turabona Manase wakoze ibintu bibi kurenza undi mwami uwo ariwe wese wabayeho mu Buyuda na Isiraheli, ariko akaza gusoza neza yihana ndetse asenya ibigirwamana yari yarubatse ndetse ategeka abantu kugaruka ku Mana.

Bibiriya iravuga ngo “Nuko rero mwana w’umuntu, ubwire ubwoko bwawe uti ‘Gukiranuka k’umukiranutsi ntabwo kuzamurokora ku munsi w’igicumuro cye, na byo ibyaha by’umunyabyaha ntibizamwica umunsi azahindukira akava mu byaha bye, nyamara ukiranuka ntabwo azabasha kubeshwaho na ko ku munsi azacumura (Ezekiyeli 33:12).”

Gusoma no Gusenga: Isoko y’Ubwenge n’imbaraga

Topic: Gusoma no Gusenga: Isoko y’Ubwenge n’imbaraga

EV. RWAYITARE Eric

                                            Gusoma no Gusenga: Isoko y’Ubwenge n’imbaraga     

…..jyewe Daniyeli nasomye ibitabo binsobanurira umubare w’imyaka i Yerusalemu hazamara hashenywe ko ari imyaka mirongo irindwi, byavuzwe n’ijambo ry’Uwiteka mu kanwa k’umuhanuzi Yeremiya. Mpanga amaso Umwami Imana yanjye, mushakisha gusenga no kwinginga niyiriza ubusa, nambara ibigunira, nisiga ivu…… (Daniyeli 9:1-4)

Muri iki gitabo cya Daniyeli haratwereka ibintu Daniyeli yakoze nk’umuntu w’umunyabwenge Imana Igeza aho Ininura satani Imubaza niba arusha Daniyeli ubwenge (Ezekiyeli 28:3), kandi nk’umuntu w’umukiramutsi ku rwego naho Imana yarimbura igihugu cyose gukiranuka kwa Daniyeli we kwamurokora (Ezekiyeli 14:14).

Isiraheli ikorana isezerano n’Imana yahawe amategeko yagombaga gukurikiza bigatuma bagira umuco, imyitwarire n’ubuzima butandukanye n’ubwa mahanga abakikije yose. Amategeko Imana yabahaye yakoraga kuri buri kantu kose kugeza aho ibabwira uko bazajya bahinga, kugeza nubwo Ibabwira uko bazajya babigenza bagiye mu bwiherero cg kwihagarika (Gutegeka kwa kabiri 23:13-14).

Kutubahiriza amategeko y’Imana byari bifite ingaruka zikomeye z’ibyago bigomba kubabaho bituma bahindukira bakongera kumvira amategko y’Imana bahawe. Igihe ibyo byago bibabayeho ntibave kwizima Imana yari yaravuze ko izagenda ibikuba karindwi mpaka bahindutse kugeza aho nibinangira izabateza ababatwaraho bunyago bagasenya igihugu cyabo cyose (Abalewi 26:14-39, Gutegeka 28:15-68).

Bamaze guhabwa Kanani yabo nkuko babisezeranijwe rero ntibabashije gushikama kw’isezerano bagiranye n’Imana. Bagiye baryica ariko Imana Ikagenda ibatumaho abantu babibutsa, rimwe bakikosora hashira igihe bakagwa kurushaho. Byageze aho Imana Itakibihanganiye Ibashyira mu maboko yabanzi babo nkuko byari byaranditswe aribyo byatumye Imana Ibatanga mu maboko yabandi bami.

Habanje gucikamo kabiri mu bwami bwa Isiraheli maze habaho igice cya Isiraheli (amajyaruguru) n’igice cy’ubuyuda (amajyepfo) biturutse ku makosa yakozwe na Salomo maze n’umwana we Rehobowamu yimye ntiyayakosora bituma igihugu kigabanywamo kabiri kuva ubwo (1 Abami 12:20).

Nyuma yo gucikamo kabiri ubwami bwa Isiraheli ntibwabashije gushikama ku mategeko y’Imana, bituma bwigarurirwa n’umwami wa Ashuri. Ubwami bw’Ubuyuda kandi nabwo bwakomeje kugenda bugomera Imana ariko Igakomeza kwihangana kugeza aho banze kwihana Ibahana mu maboko y’abanzi babo batwarwa n’umwami w’I Babuloni (Yeremiya 52, 2 Abami 25:18-21). Nimuri urwo rwego Daniyeli nawe yajyanywe I Babuloni ari muto cyane.

1.      Gusoma no gusenga kwa Daniyeli

Byaribyaranditswe n’umuhanuzi Yeremiya ko Igihugu kizaba umwirare n’igitangarirwa kandi ko amahanga azakorera umwami w’I Babuloni imyaka 70. Yashira Babuloni nayo ikabona guhanwa. Ndetse Imana yari yaravugiye mu kanwa ka Yeremiya ko iyo myaka 70 nishira Izabagenderera Ikababwira ibyiza bituma bataha. (Yeremiya 29:10; Yeremiya 25:11-13). Gusoma kwa Daniyeli rero kwatumye ahishurirwa ko imyaka ivugwa atari imyaka yo mu mvugo ishushanya (symbolic) ahubwo ari imyaka ihamye isanzwe.

Daniyeli kandi yari yarasomye igitabo cy’ Abalewi (26:40-42) n’igitabo cyo Gutegeka kwa kabiri (30:1-3) aho Imana yababwiraga ko igihe izabatataniriza mu mahanga bitewe n’ibicumuro byabo, nibihana bakavuga gukiranirwa kwabo n’ukwa ba sekuruza, ni ibicumuro bacumuye, bakemera yuko kunyuranya n’Imana kwabo ari ko kwatumye Imana Inyuranya na bo, bakihana bakicisha bugufi, bakemeresha imitima ikunze ibihano byazanywe no gukiranirwa kwabo, aribwo izibuka isezerano Yagiranye nabo ikabababarira ndetse ikabasubiza mu gihugu cyabo (Daniyeli 9:13). 

2.      Gusenga kwa Daniyeli

Daniyeli ntiyarafite umurage wo kuba umunyamasengesho uhambaye, dukurikije umuryango yakomokagamo. Ntiyavaga mu muryango w’abatambyi nka Ezekiyeli cyangwa ngo abe umuhanuzi w’umuhamagaro nka Yesaya cg Yeremiya, ariko ibyo ntibyamubujije gusenga. 

Imirimo cg se akazi ka Daniyeli nako kari akazi gatuma atabarwa nkumuntu wabona umwanya cg waha agaciro gusenga kuko yarumunyapolitike ukomeye ku rwego rwa minisitiri w’intebe, mu bwami bw’abami, bivuze ko cyari igihugu kirenze kimwe.

Daniyeli kandi mu gusenga kwe ntiyigeze yita ku cyubahiro yarafite, kuba yari minisitiri w’intebe mu bwami bukomeye cyane kw’isi muri icyo gihe, ntibyamubujije kwambara ibigunira no kwiyiriza bigaragaza guca bugufi imbere y’Imana.

3.      Umwanzuro

Bigaragara ko gusenga kwa Daniyeli mu gika cya cyenda, atari gupfa kuvuga, ahubwo ari guhuza ibyanditswe mw’Ijambo ry’Imana nibibazo arimo, akibutsa Imana ko Ijambo ryayo ryasezeranije ko nibaca bugufi bagasenga izabababarira. Yabanje gusoma amenya ibyo Imana Yivugiye mw’Ijambo ryayo maze abigenderaho ayibutsa ko ariyo yabivuze kandi akora ibyo Ijambo ryayo ryasabye, yicisha bugufi yambara ibigunira, yiyiriza ubusa.

Zaburi 138:2 haravuga ngo “…, Kuko washyirishije hejuru ijambo ryawe kurisohoza, Ngo rirute ibyo izina ryawe ryose ryatwiringije.” Dukwiye kuba nk’abitorero ry’i Beroya, kuko batatinye gushaka mu byanditswe ngo bamenye niba ibyo Pawulo yababwiye arukuri. Pawulo yanditse izandiko zirimo ubwenge butangaje bitewe nibyo Imana yamuhishuriye, ariko ibyo ntibyatumye abitorero ry’i Beroya bemera icyo avuze cyose batabanje gusoma ibyanditswe ngo bamenye ko arukuri koko (Ibyakozwe 17:11). Dukwiye kumenya niba dusenga uko Ijambo ritegeka, kandi ibyo biva mu kubanza gusoma. Aho niho hava ubwenge n’imbaraga bituma dutsinda isi y’umwijima ariko iyo tudasomye satani adufatira mu bujiji akatugusha n’amasengesho yacu agahinduka ibyifuzo byacu ariko bitari mu masezerano y’Imana, yasezeranije mw’Ijambo Ryayo. (Hoseya 4:6).

UMUGAMBI W’IMANA KUBUZIMA BWAWE

                                              UMUGAMBI W’IMANA

Yeremiya 1:5

“nakumenye ntarakurema mu nda ya yanyoko kandi nakwejeje utaravuka,ngushyiriraho kuba umuhanuzi uhanurira amahanga.”

Imana ishimwe cyane ko yatumenye kera.ijambo dusanga muri yeremiya igice cyambere tubonamo ukuntu Imana yahamagaye yeremiya imuhamagarira ubuhanuzi, ariko yeremiya we yari atari yamenya umugambi w’Imana kubuzima bwe,niko gushaka inzitwazo kugirango ahunge ubushake bw’Imana kuri we.

Uko niko bamwe babayeho bazana inzitwazo kumugambi w’Imana ariko ndagirango nkubwireko Imana yakumenye kera,kandi utarabaho yari ikuzi neza, ndetse igufitiye imigambi myiza, witinya yeriko wahura nayo uko yaba isa kose,cg ngo utinye ibigeragezo wahura nabyo uko byaba bimeze kose, ahubwo haranira icyatuma usobanukirwa neza umugambi w’Imana kuri wowe. Kuko natwe dukwiriye kumera nka yesu,tugakora umurimo w’Imana hakiri kumanywa kuko bugiye kwira tujye mugihe umuntu atabasha gukora(Yohana 9:4).

Iyo Imana ikuzi irinda ijambo yavuganye nawe,ndakubwira ukuri yuko naho wageragezwa ntakizabuza umugambi w’imana kubuzima bwawe gusohora,niko yabwiye yeremiya igihe yamwerekaga inkoni y’umurinzi ikamubwira ngo yitegereze,ikamubwirako irinda ijambo ryayo(yeremiya 1:12), haleluya, Humura uwiteka arakuzi, azakurwanirira kandi nubwo ubona bikomeye ariko iyo urugamba rukomeye ruba rugiye kurangira. Wicika intege kuko ibisitaza ntibizabura ariko hazabona ishyano ubizana. Kora umurimo w’Imana nonaha bigishoboka kuko turi abo yaremye ituremeye imirimo myiza muri kristo yesu.

N.B: Saba imana iguhishurire umugambi wayo kubuzima bwawe. Impano zose yaguhaye uzikoreshe mugusohoza umugambi wayo kubuzima bwawe.nyuma yibyo numara kwezwa no gutunganwa rwose ibizaba bisigaye uzaba ubikiwe ikamba ry’ubugingo iryo Imana iteguriye abayikunda bakagendera munzira z’amategeko yayo. Imana idushoboze,Ubuntu bw’Imana no gufashwa n’umwuka wera bibane namwe none nibihe bidashira. Amen

Kugwa kwa Luciferi: Ingaruka y’ubwibone

Kugwa kwa Luciferi: Ingaruka y’ubwibone

prepared by:  Rwayitare Eric

1.   Ibanze

Izina Luciferi ni izina satani yahoranye akiri mw’ijuru mbere yuko agwa, riboneka muri Yesaya 14:12. Luciferi bisobanura urumuri rushashagirana cg se inyenyeri yakirana cg se inyenyeri irabagirana mu rukerera. Niyo mpanvu Bibiliya z’ikinyarwanda (Bibiliya Yera, Bibiliya Ntagatifu, Bibiliya Ijambo ry’Imana) tutabonamo izina Lucifer ahubwo bajyenda bakoresha igisobanuro cyiryo zina nkuko twabibonye haruguru ariko bibiliya iri mu cyongereza (New King James n’izindi zimwe na zimwe) bakoresha izina Lucifer aho gukoresha igisobanuro cyaryo.

Muri Ezekiyeli 28 batubwira uko umwami w’I Tiro yaguye. Bibiliya iravuga umwami w’I Tiro nk’umwami uyobora ahantu hazwi ndetse n’igihe kizwi. Ariko Bibiliya irashushanya umwuka wakoreraga muri uwo mwami nka satani ubwe wayoboraga I Tiro. Ibi bibaho ko umuntu akorerwamo na satani cg indi myuka mibi kandi yambaye umubiri. Ibi biboneka iyo basengera abarwaye abadayimoni, iyo uvugana n’ufite icyo kibazo akoresha iminwa ye mukavugana ariko nanone uba uvugana na dayimoni imurimo kuko irivuga ndetse yagenda umuntu agahinduka akavuga noneho ubwe kugiti cye (Mariko 5:7-15). Daniyeli 10:13 havuga uko malayika waruzaniye ubutumwa Daniyeli yamaze igihe kinini yatangiriwe n’umutware w’ubwami bw’ubuperesi mu kirere. Ubwami bw’ubuperesi bwari buzwi ndetse n’abami babo barazwi ariko ngo hari umutware mukirere w’ubwami bw’ubuperesi ariwe watangiriye malayika waruzanye ubutumwa buvuga ibyaho. Nigutyo rero umwami w’I Tiro uvugwa muri Ezekiyeli ari Satani we ubwe kuko baravuga ko yahoze muri Edeni, bakavuga ko yari umukerubi utwikira, ikindi bakavuga ko yarafite ubuhanga bwo gukora ibicurangisho (amashako n’imyirongi) kandi ibyo nta mwami wo mw’isi wigeze amera gutyo keretse satani ubwe ariwe wari wicaye muri uwo mwami w’I Tiro icyo gihe.

2.   Gukomera kwa Lucifer

Muri Yohana 3:27 haravuga ngo “Ntacyo umuntu yashobora kwiha ubwe, keretse  agihawe kivuye mu ijuru”. Umunsi Luciferi aremwamo ngo yari intungane kandi byose byari biringaniye (Ezekiyeli 28:12-13). Uko yarameze, ubwiza n’ubwenge byose yahawe nta ruhare yabigizemo, suko haricyo yarushaga abandi bamalayika ahubwo n’impano y’Imana kuko Imana Itanga uko Ishaka (1 Abakorinto 12:11).     

Izo mpano zose Imana Yazimuhaye ngo ayiramye kandi ayihimbaze (Ibyahishuwe 4:9-11), ariko abonye akunzwe kubera impano z’Imana atangira kwigereranya n’Imana. Yibagirwa ko we yaremwe Imana Itaremwe, yibagirwa ko Imana Yamuhaye kuririmba ibimurusha kuko ntawaha umuntu icyo adafite. Yibagiwe ko Imana Yamuhaye ubwenge kuko Yo Ubwayo ariyo BWENGE. Maze atangira kwihimbaza ashaka kugira intebe ingana n’iyi Imana ngo ayishyire ku musozi w’iteraniro muruhande rw’impera y’ikazikazi abe nk’Imana (Yesaya 14:13-14).

Kuva yagambirira ibi ubwenge bwe bwarononekaye n’ubwiza bwe buta umwimerere. Kwicisha bugufi kwa Lucifer byatumaga Imana Irabagirana muriwe kuko yari umukerubi utwikira kurabagirana kw’Imana. Ibyo byatumaga ababona ubwiza bw’Imana bashimagiza Lucifer nawe agashima Imana kuko atari we ari Imana Iri kubikora. Kwishyira hejuru mu mutima kwa Lucifer kwatumye Imana Imurimbura uhereye ubwo ajyenda agwa kugeza ubwo azashyirirwa mu Nyanja yaka umuriro n’amazuku mu kugwa kwe kwa nyuma (Yesaya 14:15). 

3.   Ibyiciro 4 byo kugwa kwa Satani

Satani ntiyashatse kuzamuka ngo asumbe Imana ahubwo yashatse kuzamuka ngo areshye nayo kuko nta kure yari azi haruta Imana. Satani kandi ntiyakaga ahubwo yamurikirwagamo no kwaka kwa Yesu Kristo ariwe Nyenyeri yo mu ruturuturu yaka kuko yari umukerubi utwikira Yesu ariwe Shusho kandi ariwe Bwiza bw’Imana Itagaragara (Ibyahishuwe 22:16, Abakolosayi 1:15-19).

3.1.       Satani yaguye ava mu bwiza no kurabagirana aba igicibwa (Ezekiyeli 28:14-16). Uku kugwa niko Yesu yavuze ngo “Nabonye satani avuye mw’ijuru, agwa asa n’umurabyo” (Luka 10:18). Uku niko kugwa kwa satani kwamaze kuba gusa aho ari mu kirere we n’abamarayika bagwanye ariho bita ijuru rya kabiri, nukuvuga uvuye kw’isi (Abefeso 6:12), ukundi kugwa ntikuraba.

3.2.       Satani azongera agwe bimubuze kumenya ibibera mw’ijuru aribwo azatabwa mw’isi (Yobu 1:12, 1 Abami 22:19-21, Zakariya 3:1). Icyo gihe ntazaba yemerewe kurenga kw’isi ngo ajye mw’ijuru mu nama zaho (Ibyahishuwe 12:9).

3.3.       Satani kandi azongera kujugunywa mucyobo kitagira iherezo (ikuzimu) imyaka 1000 avanywe mw’isi (Ibyahishuwe 20:1-3).

3.4.       Bwanyuma satani azavanwa ikuzimu (icyobo kitagira iherezo) ajugunywe mu nyanja yaka umuriro n’amazuku aho azababarizwa iteka ryose (Ibyahishiwe 20:10).

4.   Umwanzuro

Tubona Yesu warufite akamero k’Imana agashyira hasi Ubumana agaca bugufi. Yahagurutse kuntebe yicaragaho ariwe Mana Isengwa kandi Ishimwa Iteka yambara umubiri mubi kandi yewe ntiyaba n’umwe mubakomeye mu bantu ahubwo aba insuzugurwa y’imbata bakoresha ibyo bashatse kugeza yishwe asuzuguritse (Abafilipi 2:5-8). Ibyo byatumye azamurwa cyaneee yiyongera birenze asubizwa Ubumana bwe kuko yemeye kubureka ngo aturengere (Abafilipi 2:9-11). kandi tubona satani washatse kwishakira izina rikomeye ngo afate Ubumana kungufu angane n’Imana. Ibyo byatumye ashyirwa hasi kugeza ubwo azakandagirirwa hasi n’ibyaremwe byose. Kuzamurwa biva mu kwicisha bugufi mu mutima, kandi kumanurwa biva ku kwishyira hejuru mu mutima. Uko niko Lucifer yahindutse satani. Uwari umwana w’umucyo ahinduka isoko y’umwijima (Imigani 18:12, Imigani 15:33, Imigani 11:2).     

Ayiweee mana utwigarurire kuko iminsi ni mibi.

 UBUHENEBERE BWO MUMINSI Y'IMPERUKA.

Ese koko turi mubihe by'iminsi y'imperuka?

 Ese ni iki umukristo yakora ngo anyure muri ibibihe by'ubuhenebere bwo muminsi y'imperuka yishimirwa nimana? 

RUTEMBEZA ERIC

 Ubuhenebere bwo muminsi y'imperuka

 Ese koko turi mubihe by'iminsi y'imperuka?

2Timoteyo 3:1-5

"umenye yuko muminsi y'imperuka hazaza ibihe birushya,kuko bamwe bazaba bikunda,bakunda impiya,birariira,bibona,batukana,batumvira ababyeyi babo,indashima,batari abera,badakunda n'ababo,batuuzura,babeshyerana,batirinda,bagira urugomo,badakunda ibyiza,bagambana,ibyigenge,bikakaza,bakunda ibibanezeza aho gukunda imana,bafite ishusho yo kwera ariko bahakana imbaraga zako.abameze batyo ujye ubatera umugongo."

aha dusomye amagambo akomeye dusanga muri  2timoteyo 3:1-5 aho pawulo yahuguraga timoteyo amubwira uko mubihe by’imperuka bizaba bimeze, amukangurira kuba maso ndetse anamumenyesha uko akwiye kuzitwara kuko bizaba ari iminsi yanyuma yo kuzagarukamo k'umwana w'Imana yesu kristo, aha ubu si timoteyo wenyine ubwirwa ahubwo natwe biratureba.kuko agakiza karatwegereye cyane kurusha igihe twizereye. biriya twasomye harugu nibyo pawulo yavuze bizaba biranga abantu bo minsi y'imperuka kandi koko iyo witegereje neza usanga iyo minsi twarayigezemo dukurikije uko ijambo ryatubwiye kubiranga abantu bo muminsi y'imperuka.

 Ese ni iki umu kristo yakora ngo anyure muri ibibihe by'ubuhenebere bwo muminsi y'imperuka?

Icyo dusabwa

1.Niba utarakira yesu nk'umwami n'umukiza bikore none.wemerere umukiza avukire mubugingo bwawe, ubatizwe mumazi menshi. uzungukirwa n'imigisha myinshi ndetse nukomeza kugendera munzira nziza zo gukiranuka uzinjira mubwami bw'imana ndetse uzarya no kuri cya giti cy'ubugingo.

2. Pawulo ati:"abameze batyo ujye ubatera umugongo". nikoko birakwiye ko umukristo wubaha imana akwiye kwitandukanya nuko abatubaha imana bagenda ahubwo akagenda munzira ze atunganye yubaha imana ndetse akora imirimo myiza yo gukiranuka mumwami yesu kristo uko tubisabwa n'ijambo ry'imana.

3. Kwirinda abigisha babanyabinyoma. aha biragoye kumenya umwigisha w'ukuri ndetse nuw'umunyabinyoma, ariko ntago kristo yadusize twenyine yadusigiye umufasha ariwe mwuka wera,niwe udufasha kumenya inzira z'ukuri dukwiye gucamo, ni umuyobozi utumenyesha iby’ubwiru ndetse namabanga y’Imana.tangira usabe imana umwuka wera niba utamufite, ndetse yadusigiye ijambo ryayo(bibiliya)  rero ibyo byagufasha kumenya ukuri kucyo imana igushakaho. ndetse umutima wawe nawo ugomba kugufasha kumenya inzira nziza ukwiye kunyuramo , mbere yo kumva icyo abandi bakubwira ku mana,ese wowe umutima wawe urakubwira iki? gerageza gushyira mugaciro ubone kwita kubyo ubwirwa n'abakozi b'imana batandukanye, ukuri kwibyo utekereza ugusanishe nibyo wigishijwe ugendeye ku ijambo ry’Imana ubone ufate umwanzuro.

4. Kwera imbuto no gukiranuka bihore kuri wowe bose bazamenya ko ubana n'Imana bareke ubugome bitabe yesu.

5.Kwiyiriza ubusa no gusenga ubudasiba nibyo byafasha umukiristo mwiza wizera ko yesu ari umwami n’umukiza w’ubugingo. Gusenga bigire intego yawe mubuzima bwawe bwa buri munsi.

6. Gerageza kwihana wirinde icyaha “amatabaza yawe ahore yaka” uharanire kugira umutima utariho urubanza cg umugayo mumaso y’Imana aha niho Imana izakunezererwa.(soma abaroma 13:13)

 Dusenge, mana ushimwe ko watumenyesheje ibihe by'imperuka tugusabye imbaraga zo kugira imyitwarire yagikristo nkuko wabitumenyesheje. mwizina rya yesu. Amen

IBANGA RY’UBUZIMA

Topic: IBANGA RY’UBUZIMA: Gutinya Imana (Gutegeka kwa kabiri 28:58-59)

Intangiriro  (Yesaya 7:15)

Yesaya yagiye mu Mwuka, ubundi iyo umuntu ari mu Mwuka ntagira igihe cyahise, igihe cyubu cg igihe kizaza, ahubwo ubona ibyabaye imyaka myinshi ishize nkibyabaye ejo, kandi ubona ibizaba imyaka myinshi izaza nkibiri kuba aka kanya. Niyo mpamvu Imana Ivuga ngo ndi Alufa na Omega arizo nyuguti zikigereki A na Z mu Kinyarwanda bivuga ko kubera Iba mu Mwuka Iteka Iba Ibona Ibyahise n’ibizaba nkaka kanya. Ibyo nibyo bituma Yitwa Ndiho (Bivuga ngo Ndiho ejo hashize ndiho uyumunsi Ndiho n’ejo hazaza). Mbere yuko igihe kibaho Imana Yabagaho kuko Niyo Yaremye igihe Imaze igihe Ibaho.

Iyo uri mu Mwuka rero Umenya byose, Niko byagenze kuri Mose, Mose yahuye n’Imana ajya mu Mwuka Imana Imwereka byose: Niyo mpamvu yanditse igitabo cy’Itangiriro kivuga ibyabaye mu myaka irenga igihumbi ataravuka. Akamenya ibya Adamu, ba Enoki naba Nowa babayeho kera cyane ataravuka. Yewe kujya mu Mwuka byatumye anamenya ubuzima bwa Sekuruza Aburahamu, Isaka, Yakobo n’abandi.

Rero hano Umurongo twasomye Yesaya yagiye mu Mwuka, mbere y’imyaka 600 yuko Yesu avuka. Abona umwari arasamye, abona arabyaye, mbere yiyo myaka yose abona ibyo Imana yateguye bizatunga uwo mwana ngo abona atunzwe n’amata n’ubuki kugeza aho yamenyeye Ubwenge bwo kwanga ibibi agakunda Ibyiza (Ibaze Imana Iba Yarateguye ikizatunga umuntu mbere y’imyaka 600 ko abaho).

Ubu bwenge nubwenge butangaje, n’ubwenge bukoreshwa n’Imana mw’Ijuru burenze ubundi bwenge bwose ushobora kumenya kuko ubu bwenge nibwo bwaremye: Isi, bwaremye ijuru, nibwo bwaremye amabuye ya colta bakoramo izi telefoni dukoresha (touch screen), bwaremye izuba burema ukwezi n’inyenyeri. Nibwo bwaremye amatsinda y’inyenyeri, nibwo bwaremye isanzure nibwo bwaremye ibibaho byose.

Ubwo BWENGE rero nibwo uwo mwana uzavuka azaba afite, ubwenge bwo kwanga ibibi agakunda Ibyiza. Muri Yesaya 11:3 haravuga ngo…Azanezezwa no kubaha Uwiteka, ariko Mucyongereza ho iyo urebye ukabihuza nuyu murongo muri Bibiliya ya King James ubona ko havuga ngo …Azanezezwa, cg se ngo azihutira cg se azagira ubwira bwo kumva mubyo gutinya uwiteka.

Ubu bwenge bwuyu mwana butandukanye n’ubwenge Eva yashakaga, kuko ibyatumye Eva akora icyaha ngo nuko yashakaga ubwenge:

-Itangiriro 3:6,

Ibi byatumye nkunda Eva kuko byibuze we yashakaga ubwenge ntameze nkatwe uyu munsi: kuko icyatumye yemera kurya kuri icyo giti byibuze yakibonyeho ibintu bitatu (3) byo gushima: …. (1) ibyo kurya byiza, (2) cyari iki gikundiro, (3) ngo cyari icyo kwifuriza kumenyesha umuntu ubwenge. Amaze gushima ibyo bintu bitatu ararya kandi kuko Atari igisambo ahaho n’umugabo we ntiyarya wenyine. Gusa ikosa Eva yakoze nuko yashatse ubwenge kandi abufite kuko Imana yari yarababwiye ngo Ntimuzarye kuri iki giti kandi Yobu 28:28 haravuga ngo “…kubaha  Uwiteka nibwo bwenge” (aribyo gutinya Uwiteka muzindi Bibiliya). Rero ubwenge Eva na Adamu bari barabuhawe icyo basabwaga n’ukugenderamo.

Ninkatwe uyu munsi dufite Yesu ariwe wa mwana Yesaya yabonye, twahawe ubwenge bwo kwanga ibibi tugakunda Ibyiza:

Kwanga kubeshya, kwanga kurarikira ibitari ibyacu, kwanga kwiba tukanyurwa nibyo Imana Iduhaye, kwanga kuriganya amasambu y’impfubyi zasizwe na bene wacu, kwanga ubusambanyi bwose, kwanga kuroga no gusenga ibishushanyo, kwanga gukora ibiteye isoni, kwanga ibyo Imana Yatubujije byose,

Twahawe ubwenge kandi bwo gukunda Ibyiza: Ubwenge bwo kwizera, ubwenge bwo kugira ingeso nziza, ubwenge bwo kwirinda, ubwenge bwo kwihangana, ubwenge bwo kubaha Imana.

Ikibazo niki: Kucyi tuba nka Eva tukajya gushaka ubundi bwenge kandi ubwenge twarabuhawe??? Dufite ubwenge ahubwo igikenewe nukugendera mubwenge twahawe ntituve mu bwenge dufite ngo tujye gushaka ibindi ducyeka ko aribwo bwenge nka Eva kumbi bituroha.

-Imigani 17:24: Tujya gushakira ubwenge kumpera y’isi tubusize kumusego wacu, kuko Umuntu atega imodoka akajya I Cyangugu agiye guhura na kanaka ngo amufashe uko yariganya imari uwo bakorana kandi asize Bibiliya kumusego imubwira ko Imana yanga uburiganya kandi ko kubaha Uwiteka aribwo bwenge. Kandi uva aha ukajya I Rutsiro gushaka umurozi ukwicira uwo wanga kandi Imana Yakubwiye ijambo ko abicanyi n’abagome batazaragwa ubwami Bwayo

-Daniel 6, kuko yahisemo kubaha Imana no gukora ibyo Imana Ishaka byaramukijije naho ubundi aba yarapfuye kera kubwabamugambaniraga. Ariko babuze icyo bamutega kuko Yatinyaga Imana. Daniel ntiwamutega ruswa, ntiwamutega zahabu, ntiwamutega inyama kuko barazimuteze ahitamo kurya ibishyimbo arazireka, ntiwamutega icyubahiro no kumuzamura ngo akomere.             Ngo babuze icyo bamutega kugeza babonye kumutegera kugukiranuka kwe. Kuko igihe bavugaga ngo tumutegere kugusenga umwami akareka Imana Ye, iyo abikora baribube bahombye. Mbese inyungu zabo zaruko akomeza gusenga Imana kugirango ikirego cyo kudasenga umwami kibeho bamwice. Maze akomeza kubaha Imana abakorera ibyo bashaka.

-Tuvugishije ukuri: Wowe uri Imana wareka gutabara uwo muntu wakwizeye gutyo koko??? Kuko icyo tubura n’ukwizera Imana kuko KWIZERA kugaragazwa nibyo dukora samagambo yacu ngo turizeye. Niba umuntu yizera ko Imana yamugaburira niki gituma yiba ngo yigaburire uko itagabura?? Kuko inzira Imana igaburamo zirazwi yarazitubwiye. ….. “Nzaha umugisha imirimo y’amaboko yawe apana ubujura bw’amaboko yawe”.

Niba wizera ko Imana itanga ibyishimo kucyi washakira ibyishimo m’ ubusambanyi cg ubusinzi kandi Imana yarashyizeho uburyo bwo gushaka umugabo wawe muburyo yavuze no kunezerwa mu Mwuka Wera.

RERO GUTINYA IMANA BIZANA UMUGISHA KANDI KUTAYITINYA BIZANA UMUVUMO: Ibi turabibona kubwoko bwa Israel bwari bufite umuhamagaro wo Gutinya Imana (Kubaha) bikabuhesha umugisha wo gutunga no gutunganirwa CG gutumwira Imana (gusuzugura) bikabuzanira umuvumo no gupfusha ndetse no kurya intumbi z’abantu ninda zavuyemo bakazirya! Biturutse kukutumvira Imana. Kandi bakabirya n’appetit nyinshi bacuranwa ntawuha undi.

I. Ibyiza byo Gutinya Imana

-Gutegeka2 28:1-9-14>>> Iryari isezerano ry’igihugu Imana yagiye irisohoza kuri bamwe na bamwe bubahirije Conditions (ibisabwa), urugero: 1Abami 17:16…igiseke cy’umupfakazi Imana Yagihaye umugisha kivamo ifu idashira mugihe cy’amapfa ibatunga na Eliya kubwo kubaha Imana. Ibaze haje umuntu akakubwira ngo “mpa iyo bibero uri kunywesha uwo mwana nywe ayo mata niko Imana Ivuze kandi arumugabo umwana wawe ashonje nawe aruko, ariko kubwo gutinya Imana ukabikora kuko avuze ngo niyo Ibivuze kandi ukaba ubizi ko ari umukozi Wayo”. Ibyo byatumye Imana Iha ikigega (ikibo) cye umugisha havamo ifu ibatunga mugihe cy’inzara. (Ibi bivuze icyintu kinini: Business (akazi ukora kose) iyo uyishoye mugukorera Imana mbere na mbere niyo yaba arigihe ubukungu bumeze nabi yego ntiyiyongera kuko icyo igiseke cye ntibavuga ko cyabaye kinini cyanga ngo bibe ngombwa ko yagura aho yabikaga ifu nk’umutunzi w’umupfapfa wo muri Luka 12:18 ariko ikomeza kuvamo ibigutunga wowe n’abana bawe n’abashyitsi bagusura)

II. Ingaruka zo kutumvira (Kudatinya) Imana

-“Gutegeka2 28:53-57” BISOHORA -2Abami 6:28-29” Aba bagore bari bariye umwana kuko umuvumo wo kudatinya Imana wabasohoyeho. Kandi urumva ibyo bari babanje gukora mbere yo kurya umwana. Ikindi urumva ko gyhita bitura kumwami ngo bamuregere nuko barabantu bakomeye ariko umuvumo wo kudatinya Imana ubageza aho kurya imbuto zo munda zabo.

III. Gukomera kw’isezerano rishya kuruta irya mbere

-       Abaheburayo 10:26-31: Niba abishe isezerano rya mbere barahuye n’ibyago bivugwa mu Gutegeka2 28:15-68 kandi Bibiliya yo ivuga ko ariryo ryoroshye (simvuga ibyo abantu bavuga kuko abenshi bivugisha ko Isezerano rishya ariryo ryoroshye), mujye mwibaza icyo twe bizatubyarira igihe Tutubashye Imana ngo dukore ibyo Ishaka!

Isengesho: Data wo mw’ijuru uduhe kugutinya no guhora tunyotewe no kugendera mu nzira yo gukora ibyo ushaka. Mw’izina rya Yesu. Amen!

By Maitre Rwayitare Eric ayobowe n’Umwuka Wera

"Ungose inyuma n'imbere,Unshyizeho ukuboko kwawe"

Imana itugose imbere n'inyuma dukomere ntidutinye.

Zaburi iyi yahimbiwe umutware w'abaririmbyi. Ni iya Dawidi.

Uwiteka,warandondoye uramenya,uzi imyicarire yanjye n'imihagurukire yanjye,umenyera kure ibyo nibwira. Ujya urondora imigendere yanjye n'imiryamire,uzi inzira zanjye zose. Kuko ijambo ritaraba mururimi rwanjye,uba umaze kurimenya rwose,Uwiteka.

Ungose inyuma n'imbere,Unshyizeho ukuboko kwawe. kumenya ibikomeye bityo ni igitangaza kinanira,kuransumba simbasha kukugeraho.

ZABURI 139:1-6

Amen,

Iyizaburi ni iya dawidi ubwo yaramaze kumenya neza ndetse nogusobanukirwa rwose uburyo Imana iri muruhande rwe, niko kuvuga ayo magambo twasomye haruguru. rero nshuti ndaguhamagarira gukomera muri byose kuko umwami Imana irimuruhande rwawe umubisha ntaho yava, humura Imana irakuzi ntukihebe kuko ari Imana yawe. irimurahande rwawe ndetse iminsi yo kubaho kwawe Imana irayizi rero izakujya imbere ahataringaniye iharinganize. ubwayo yarivugiye iti:"erega nzi ibyo nibwira kukugirira ni ibyiza si ibibi kugirango mbareme agatima kibizaza". duhumure iratugose imbere n'inyuma ndetse ukuboko kwayo ikudushyizeho indwara zirakira, ubukene bugashira, amahoro akaboneka. izi ibyawe byose ibyo wifuza mubuzima byose biharire uwiteka usenga ubudasiba ndetse ukorera Imana n'umutima ukunze kandi utunganye. 

Mana uduhe umutima ukomeye ufite ibyiringiro. Amen

Yambwiye ko ndi umunyabyaha ndihana ndizera arankiza mvuka ubwakabiri.ubu ibyo ndirimba n'ibyo mvuga nshima umukiza ubudasiba.

                                     "Indirimbo ya 97 mundirimbo zo gushimisha Imana."

                       Evangeliste: Rutembeza eric      0782220557  / 0728220557